COLUMBUS, OHIO - Qiyaastii Lix saacadood oo safar aan kagasoo ambanbaxay
Canada kabacdi, goor ay tahay 8:30 fiidnimo (oo qorraxdu baalka sii dhiganeyso)
ayaan dhanka Woqooyi kasoo galay magaalada Columbus ee Gobolka Ohio, USA. Waxa
aan soo beegsaday meel dukaamo xiriirsan ah oo ah nooca looyaqqaan
"Mall" si aan tilmaantii aan ku socdey u xaqiiqsado (maadaama uu
safarkani ahaa kii iigu horreyey ee an ku imaado magaaladan), markiiba halkaas
waxaan kula kulmay wiil Soomaali ah oo kamida shaqaalaha Mall-ka. Markii aan
weydiiyey xaafada ay Soomaalidu ugu badanyihiina wuxuu isiiyey tilmaan hagaagsan.
Waxa aan sooqaaday wadada "Morse Road" oo ah wado ku caan ah
Soomaalida, waxaana lagu qiyaasay sida wadada "Dixon Road" ee
Toronto, wadadaas oo marka magaceeda la maqlo ay maskaxdaada kusoo dhacayso
Soomaali. Cabbaar markii aan wadadaas qaaday ayaan istaagey meel isgoys ah oo u
dhow wadada "Cleveland". Markiiba waxaa dhanka midig igaqabtay bidhaan
Soomaaliyeed, waa makhaayad ay leeyihiin Soomaali oo harteeda ay taaganyihiin
gawaari ay Soomaaliyi ku dhexsheekaysanayaan, salaan gaaban kabacdi waxaan
weydiiyey xaafada "Capital Park" oo aan tilmaanteeda haystey,
waa xaafad u dhiganta "Cedar" oo ah Minneapolis ah ama EastLeigh
(islii) oo Nairobi ah oo hadii aad dhex istaagtid la mid ah adiga oo
ceelgaab taagan.
Marka aad timaadid "Capital Park", waxaa kuusoo baxaya guryo
farabadan oo xiriirsan oo aan aad u dhaadheerayn, laakiin ka kooban dabaqyo is
dulsaaran, waxay iigu muuqdeen in gebi ahaanba ay Soomaali degganyihiin maadaama
ay carruur Soomaaliyeed oo farabadan ku cayaarayaan dhammaan barxadaha guryahaas.
Markii aan waxyar joogey Columbus, wixii iigu horreeyey ee aan dareemay waxa
ay ahayd in carruurta Soomaaliyeed ee reer Columbus, Ohio ay afka Soomaaliga aad
uga badiyaan ama ugaga xariifsanyihiin carruurta Soomaalida Toronto. Marka aad
la sheekaysatid carruurta Som-Columbus waxaad dareemeysaa niyad sami maadaama ay
kugula hadlayaan af-Soomaali fasiix ah, marka aad lasheekaysatidna ay kuugu
jawaabayaan Af-Soomaali. Waxay ahayd arin yididiilo leh isla mar ahaantaana ku
dayasho mudan.
Dhallinyaro Soomaaliyeed oo aan wax ka weydiiyey Soomaalida magaalada
Columbus waxaa iiga soo baxay in:
- Soomaalidu ay gobolkaan Ohio yimaadeen lixdii sano ee ugu dambeysey,
- Soomaalida Ohio deggan in lagu qiyaasay ilaa 15,000 oo qof (inkasta oo
Soomaalidu ay yihiin dad guurguura oo tiradaasi marwalba isbedelikarto, waa
sida dhallintaasi ii sheegeene)
- Soomaalidaas cadadkaas ah in ay ugu badanyihiin hal dhinac oo magaalada
ah,
- Soomaalidu in ay Columbus kuleeyihiin ganacsi soo kobcaya, sida dukaamo
iyo makhaayado,
- Soomaalida Ohio ay yihiin dad shaqaysta, qowmiyadaha kale ee ay la
noolyihiin ay jecelyihiin hab dhaqanka Soomaalidaas,
- Xagga waxbarashada waxaa la iisheegay in aad arkeysid gawaarida carruurta
iskuulka geeya qaar kamida in gebi ahaanba ay buuxiyaan carruur Soomaaliyeed,
taas oo tusaale loo soo qaatay sida ay ugu dadaalayaan wax barashada hoose/dhexe.
Xaga mac-hadyada iyo jaamacadaha weli kuma badna, waxaase ifafaaluhu
muujinaya in mardhow ay ugu badan doonaan Sida Soomaalida Minnesota oo kale,
kuwaas oo (waa Som-Minesota'e) xagga tacliinta ugu horreeya (sida la
qiyaasay) dhammaan Soomaalida kudhaqan Maraykanka. Waana tartan waxbarasho
oo cusub oo halkaas uga bilaabmay Som-Ohio iyo Som-Minnesota.
- Dadka Soomaaliyeed ay ku kaal firdheen dunida dacaladeeda loona
baahanyahay (ama ay lagama maarmaan tahay) isku xir jaaliayadaahaas.
Saacado tirsan ayaan joogey Columbus markii aan qoraalkaan qoray,
waxaanse isku deyayaa hadii Allah idmo in aan wixii dheeraad ah ee aan kala kulmo
Soomaalida Columbus inta aan safarka kujoogo aan usoo tebiyo akhristayaasha
SomaliTalk.